ناس مقنعه فعلا

يوم رائع فعلا

طبعا ما انا نايم طول اليوم

كل ده علشان دمى ميتحرقش من اللى هشوفه واسمعه سواء من الناس او القنوات الفضائيه

لكن تقول ايه بردو قله العقل متوفره

صحيت قبل المغرب فقلت اشوف التلفزيون المصرى ( لان القنوات الفضائيه معروف هتقول ايه ) وبالتحديد القناه الاولى

والحمد لله زى ما توقعت تماما

كل اللى فى التلفزيون اكدوا ان اليوم كان ثمره للتعديلات الدستوريه الجديده

الناس راحت اللجان وصوتوا بحريه تامه , وكمان مكنش فيه تزوير ,وطبعا الشرطه لم تتدخل , والاشراف القضائى متوفر

صحيح الاشراف القضائى كان فى اللجان العامه لكن كان فيه اوامر للقضاه بالمرور على اللجان

طبعا القضاه لم يكونوا فى اللجان حفظا على هيبه القاضى !

وكمان حزروا الناس من القنوات الفضائيه والجرائد الصفراء اللى هتقول ان كان فيه تزوير

لا وقالوا كمان ان المنافسه كانت شريفه ( بين مين ومين مش عارف ) 1

سالتنى زوحتى انت بتشوف وبتسمع ايه

فقلتلها بحاول اتعلم

قالت تتعلم ايه

قلتلها الناس دى مقنعه وبتتكلم بجراه كانهم بيقولوا الصدق

اى والله تسمعهم وتشوفهم كانهم فعلا على حق

السؤال اللى نفسى اللاقى له اجابه بجد

الناس دى مصدقها اللى هيا بتقوله ؟؟؟